Qazaqstandaǵy О́zbekstan jyly aıasynda Jambyl oblysy ákimdiginiń jáne "Asyl Dızaın" sán úıiniń uıymdastyrýymen "Araı plaza" kesheninde ótken saltanatty sharaǵa Qazaqstan Respýblıkasynyń Memlekettik hatshysy, Qazaqstan Respýblıkasy Áıelder isteri jáne otbasylyq demografııalyq saıasat jónindegi komıssııanyń tóraıymy Gúlshara Ábdihalyqova arnaıy kelip qatysty. Gúlshara Naýshaqyzy álemniń 19 memleketinen kelgen qonaqtardy saltanatty sharanyń ashylýymen quttyqtap, jumystaryna sáttilik tiledi.
Budan keıin О́zbekstan Respýblıkasy Áıelder isteri jónindegi komıssııa tóraıymynyń orynbasary Mýkram Nurmatova tarazdyqtarǵa ózbek halqynyń ystyq sálemin jetkizdi. Qazaq elinde ótip jatqan sán aptalyǵynyń mańyzdylyǵyna toqtaldy. Al óz sózinde Jambyl oblysynyń ákimi Asqar Myrzahmetov ejelden Taraz tarıhı qala ekenin, osyndaı baı mádenıetimizdi tamashalaýǵa kelgen sheteldik azamattarǵa alǵys bildirdi.
Budan keıin jýyrda ǵana Italııa memleketiniń Mılan qalasynda óner kórsetip kelgen jergilikti dızaıner Aıdarhan Qalıevtiń "Taraz perishteleri" sán úlgileri kórsetildi. Italııa, Fransııa, О́zbekstan sııaqty kóptegen memleketten kelgen sángerler bul qoıylymdy qyzyǵa tamashalady. Jalpy, Taraz qalasynda alǵash ret bastaý alǵan sán aptalyǵy bir apta boıy kóne shaharda jalǵasatyn bolady. Jambyl oblystyq týrızm basqarmasynyń basshysy Qarlyǵash Aralbekovanyń aıtýynsha, osy ýaqyt aralyǵynda sheteldik qonaqtar Áýlıeata óńiriniń tarıhı jerlerine saıahat jasaıdy. Sonymen qatar, ultymyzdyń ulttyq taǵamdaryn sheteldikterge nasıhattaý maqsatynda "Dámdi, "Taraz - food tourism - 2018" ulttyq taǵamdar kórmesi ótkiziletin bolady. "Rýhanı jańǵyrý" baǵdarlamasy aıasynda uıymdastyrylyp otyrǵan sharada jergilikti aspazdar kelýshilerge túrli taǵam túrlerin usynyp, qazaqtyń salt-dástúrimen tanystyrady.
Baıqaýǵa taǵam týrızmi salasynda eńbek etip júrgen 100-ge jýyq shet eldik jáne 300-ge jýyq qazaqstandyq týrıst keledi dep kútilýde. Sondaı-aq, "Kóne Taraz" tarıhı-mádenı kesheninde taǵam týrızmin tanytý taqyrybynda semınar keńester, sheberlik sabaqtary uıymdastyrylady. Jáne bir apta boıy sheteldik dızaınerler ózderiniń úzdik sán úlgilerin kórsetedi.
Hamıt Esaman,
"Egemen Qazaqstan"
Jambyl oblysy
